السخيف رامز جلال

درجت موضة من كم سنة بكل شهر رمضان الله بلانا ببرنامج مقالب رامز جلال والكل بيحضرو الي بيحبو والي ما بيحبو صارت مشاهدة البرنامج طقس من طقوس رمضان حتى انا بحضرو وبكون متشوقة اشوف مين “النجم” المنحوس الي رح يتمقلب… 

في جدل قائم وما حدا قادر يأكد هل هاد تمثيل ام حقيقة؟ معقول كل هاد تمثيل وبيضربوه وبيشتموه مشان نسب المشاهدة؟

برنامج رامز برنامج ناجح جدا والا لما كان دفعوا ميزانية ضخمة لانتاجو واضح انها مبالغ هائلة تدفع على كل حلقة مشان تخويف واحد مشهور او شبه مشهور لرؤية رد فعلو وهوخايف ومفكر حالو رح يموت

وهاد البرنامج الناجح والي يعتبر انجح البرامج التلفازية للاسف لا يحمل اي قيمة او معنى او هدف يعني انا شخصيا بحس بالحزن وانا بحضر الناس عم تتشهد وهيي مفكرة انها  لحظاتها الاخيرة ورح تبلعها الرمال المتحركة او السحلية الكبيرة وانها رح تموت. 

هل هذا هو الترفيه؟ هل فعلا نحنا بنستمتع وبنتلذذ لما نشوف واحد حاسس انو رح يموت وبقمة الخوف والفزع؟ واحد بيتشهد وبيدعي الله ينجيه من الموت؟ حتى لو كان تمثيل وين المتعة؟ وين الترفيه؟ هل فعلا شيء مضحك وضع انسان بموقف كهذا؟ مجرد سؤال

ليش سمحنا لشخص تافه وبرنامج حقير يوصل لهاد النجاح؟ 

اصلا الحق مش عليهم الحق على الممولين الي دفعوا الله يعلم كم مليون مشان هيك برنامج والناس عم بتموت من الحروب والجوع والفقر . 

اشي بيغم على القلب والله 

حتى لو عملت #حملة_مقاطعة_برنامج_رامز_جلال

سحر عقولنا بتقل دمو وتعليقاتو على كل ضحية الي انا متاكدة ما حدا بيحب حدا يفصل فيه وبلبسو وبحركاتو  . بهاد الاستهزاء السي


الله يديم علينا نعمة العقل


سيرين عبود



Advertisements

the عادات سيئة ١

في نوع من الناس عندهم عادة سيئة جدا ما بعرف هيي بالجينات ولا متوارثة ولا مكتسبة ولا هي “فياعة” ولا شوفة حال وبصراحة شريحة كبيرة من المجتمع…
بتشوفي بنت من زمان ما شافتك “او حتى يمكن هلا اتعرفتي عليها” اول شي بتحكيه “ليش هيك نصحانة؟” او “ليش هيك صاير وجهك؟” او “ليش هيك شعرك خفان؟” او “ليش نحفانة هالقد ارجعي انصحي احلى” او “ليش وجهك معبى حبوب” او حتى الشباب “صلعتك زادت كتير” “كرشك صاير ٤ متر”…”وجهك ذبلان” …”كانك مريض” .. يعني هدول الناس بتبعوا اسلوب ترحيب فوري بتنكيس وتعييب على كل شي ممكن يعلقوا عليه. 

انا الي بستغربو انو بيبدو الملاحظات العبقرية هاي بدون ما حدا يطلب رأيهم يعني بتجيك الانتقادات هاي زي الكفوف بدون ما تطلب راي حدا.

بتزكر اول مرة بلشت هاي الامور تنرفزني سنة اولى جامعة كنت باخد دوا يمكن نص العالم اخدوه اسمو رواكتين بيطلع كل الحبوب من تحت الجلد لتصفية البشرة وكان لازم اتحمل كزا شهر ووجهي “محبحب” . صار الكل يسالني الي بعرفو والي ما بعرفو “ليش هيك وجهك” اولها كنت اقعد اشرح الوضع للناس وقصة الدوا وبعدين مرة وحدة سالتني جاوبتها “فكرك انا حابة يكون وجهي هيك؟” عادي شايفتو وبعرف!

انا مش بحاجة ابرر للناس اشي ولا الربع كيلو الي زاد بوزني ولا شعري المنكوش ولا الحبة الي على صباحي.

والصدمة الكبرى لما تكون عبارة مش سؤال يعني كطرح فكرة يعني هنا تكمن تفاهة وسذاجة الشخص حتى ولاد صف اول ما بعملو هيك يعني لما وحدة تجي تحكيلك فجأة “على فكرة انتي عيونك صغار مو كبار” او على فكرة انتي شعرك خفيف او “على فكرة انتي حنطية مو بيضة” او “بس لو تنحفي شوي” يا جماعة يا عباقرة زمانكم مين انتو لتقررو الامور مبدئيا؟ ومين انتو لتبدو رايكم الي ما حدا حابب يسمعو ؟ خلصت المواضيع الي ممكن تفتحوها؟؟؟ ما ضل شي غير تحكو عن سلبيات الشحط الي قدامكم؟ 

ارتقوا شوي .. ارتقوا بتفكيركم وعقولكم البنت الي بتنصح بتعرف انها بتنصح والي بتنحف بتعرف والي شعرو عم يسقط هو اول واحد بيحس وكل واحد بشوف وجهو بالمراي كل يوم وبشوف خلقتو… ليش تحبطو الناس فوق ما هي محبطة؟ 

حابين توجهو نصيحة للشخص وخايفين على مصلحتو وعاملين حالكم انسانيين في الف طريقة تنصحوا وتشجعوا بدون تجريح واحباط وفوقية و”تنكيس” لانو كلنا عيوب وما في شخص كامل 

ليش ما نرفع بعض نمدح بعض ونتغاضى عن الامور السطحية هاي ليش؟ ليش مصممين تنكدوا على الواحد فوق مهي الحياة منكدة عليه؟ خلص يعني مرحبا كيف حالك بس لا تضيفوا تعليقات ما حدا طلبها ارجوكم اتوسل اليكم. ما حدا طلب تجاملو بس فكونا من التعليقات الي انتو نفسكم بتكرهوها.. في كتير امور اهم من انو الواحد يكون نصحان او نحفان واهم من حبة على جبينو وبنطلونو وشعرو وجسمو الحياة اكبر من هيك يا قوم.




الزائر الأبيض

والله بيقولوا في منخفض قطبي من أول الأسبوع

وبلشوا الناس ينعجقوا بالموضوع و”ياي رح نعطل” ورح نلعب بالتلج وبنلاقيهم طوابير في المخابز يجيبوا خبز قبل الثلجة

وتزويد صوبات الكاز والغاز بالوقود

وتمون الناس بالكستناء والبطاطا المشوية استعدادًا للزائر االأبيض ويتبادل الناس التهاني الحارة بمناسبة قدوم الزائر الأبيض وبيبلشوا يبعتوا مسجات وهلأ على الفيس بوك… الكل بيكتب

OMG it’s snowing

والله؟؟؟

هادا هو الحال كل سنة.. كل سنة في الأردن؟

كيف التلج في الأردن؟؟؟

بتبلش الدنيا اتلج بالليل… بيقفوا الناس على الشبابيك وبتبلش إشاعات بكرا ما في دوام وبكرة عطلة وتغمر السعادة الجميع ويبارك الناس لبعضهم البعض هذه المناسبة السعيدة

صباح اليوم التاني يا بيكون الثلج مسك أو ما مسك…

لو ما مسك “بالغالب ما بمسك وبيذوب الثلج وبيبان المرج” بيقوم كل واحد زي الشاطر وبلبس وبيروح على المدرسة أو الجامعة أو الشغل لإنو طلع الموضوع كلو عرطة وحملونا جميلة “مين هم”؟ بنقطة الثلج اللي نزلت

لو مسك الثلج بتصحا بتلاقي “الأردن وقد اكتست بشرشف أبيض” على قولة محمد الوكيل

وبتلاقي الستلايت بطل يشتغل عشان أكوام الثلج وما في إلك غير الراديو وصوت محمد الوكيل ورجال من الأمن العام

بيحكو “طريق عمان السلط مغلق نهائي… طريق البقعة صويلح سالك بحذر” ونحذر الإخوة المواطنين من الإنزلاق على درج البيت وإنزلاق السيارات والشاحنات في الشوارع الفرعية ووقوع المواطنين من على الجسور واحتياطات الأمن والسلامة وفتح الشبابيك أثناء استعمال صوبات الغاز والكاز والرجاء من الإخوة المواطنين ارتداء بسطار عند الخروج من المنزل … إلخ

بتقرر تستمتع بالثلج بما إنو اليوم عطلة… وبتلبس مليون جاكيت على مليون بنطلون

وبتاخد جزرة وقرشين عشان تعمل سنومان يا عيني عليك

وبتطلع وبتموت من البرد وبيرموا عليك ولاد الجيران كرات الثلج “جواتها حجر” وبتفشخك وبترجع على البيت بعد 5 دقايق بالزبط وإتنا زهقان من الثلج  ووجه غرقان بالدم “من كرات ولاد الجيران الثلجية” وبتكفر على ولاد الجيران

شو فيه؟ ما إلك غير عمان الأولى يا معلم .. ما في غيرها شغال هلأ

بتفتح بتلاقي أغنية فيروز “تلج تلج عم بتشتي الدني تلج” ومشاهد من الإذاعة والتلفزيون من أيام ما ثلجت بالتسعينات

وبعدين يا مسرحية العيال كبرات يا مسرحية “مدرسة المشاغبين” اللي بيلاقوه بوجههم

وبتقعد جنب الصوبة (أو على الصوبة) مستمتعًا بيوم الإجازة والثلج والزائر الأبيض

هذا هو الثلج في الأردن

ENJOY IT 🙂

فلسفة زيادة… ما بدها

شعبنا الأردني فيلسوف كتير

الكل أبو العريف بفهم بكل شي والكل بيعرف كل شي

نفسي أسأل حدا عن إشي ويحكي ما بعرف

بتعرفي تطبخي منسف؟ آه (وهي ما بتعرف تغلي مي) هاد بالنسبة للبنات

بتعرفي شو هو السبويلر؟

الجواب : أه عنا كتير منو في البيت، مرمى في كل مكان

بتعرف شو هو البرونزاج؟

أمي طبختو قبل أسبوع

جد إنهم بيحطوا حالهم بمواقف بايخة

الكل بيفهم وبيتفلسف بكل المواضيع، السياسة الاقتصاد الموضة المكياج كل الشعب بيشارك بيكل شي

وبرضو بنخص شوفيرية التكاسي بالموضوع

ما في شوفير تكسي ما بيفهم بيكل إشي، بتفلسف بكل إشي وما بيصدق تفتح معو موضوع عشان يكرتلك اللي حافظو ويعرط عليك شوي

نفسي أحكي لحدا إشي وما يحكي “كنت عارف”… مشا لله يخزي العين الشعب المنجم اللي بيفهم بيكل إشي

مثلاً بتحكي لفلان إنو عبير عيسى وربيع شهاب تركوا بعض، مش يسكت ، لأ، لازم يسلخك التعليق ما غيرو”أصلاً كنت عارف ومتوقع هاد من أول ما عرفت إنهم صاحبو بعض

بتقول للناس : تركت الشغل، بيقولوا: والله كنا حاسين إنك مش رح تقدر تصمد

لقيت شغل، والله كنت حاسس إنك رح تلاقي شغل

لما بنت تشوف واحد ميت على واحدة (بشعة) وبيحبها ومش راضي يطلع على وحدة تانية دغري بتحكي: أكيد هاي عاملتلو عمل وسحر وأبصر شو

خلص دغري استنتجت إنها عملتلو عمل (الله يبعدو عنا وعنكم)

كلمة “مش عارف” كتير سهلة

ليش ما نتعلم نحكي “مش عارف؟؟؟” كلمة جميلة ومعبرة

مش عارفة؟ مش عارف

ما في أسهل منها

وفلسفة زيادة ما بدها

كل الحقوق محفوظة

يا هلا بالقرابة

لن يفهم ما سأتحدث عنه الآن إلا من يعيشون في الاردن وفي مدينة عمان العاصمة بالتحديد

شوفولي هادا الموقف مثلاً، بتكون واقف على طابور في البنك أو طابور على الكاش وبلف عليك اللي قدامك وبيجحرك، فبتعصب، لأنك خلقة معصب من الدور الطويل ومش ناقصك غير يجحروك الناس، فبتقرر تجحرو جحرة قوية، فبجلس الشب وبعرف غلطو (بس ما بدي أظلمو، ما في بإيدو إشي إحنا شعب بنجحر بطريقة لا إرادية غير متعمدة كطريقة للتواصل مع الناس) فبحاول ينقذ الموقف وبيحكيلك

يا أخي أنا شايفك من قبل ، بس مش متذكر وين

يا عيني على هاي الجملة ما أحلاها!!!! هاي الجملة قائم عليها مجتمعنا الأردني كلو!!! وهي الجملة الأكثر استعمالاً بالأخص عند تزبيط البنات، يعني شايفك من قبل ووجهك مألوف أقدم عبارة تزبيط في الأردن ولسه الناس بتستعملها كل يوم، قدييييمة يا جماعة لاقوا إشي تاني، يعني بالله عليك؟ شايفني من قبل ؟ وإزا شايفني ؟ خلص صرنا قرابة وحبايب؟

ما علينا ، المهم  نرجع للشب اللي واقف فوق وعايف حالو ، قرر يجامل الشب اللي بيجحرو ، إنتا شو اسمك عفواً يعني؟

أنا مايكل العبادي (هاد اسم عشوائي) مش قصدي أي شخص معين

شو بقربلك جون العبادي؟

هاظ أبوي!

وخدلك بعدها… أبوك كان شريكي بالمحل قبل ما بعتو واشتريت تلفون وبتذكرك وإنت طولك شبر لما كنت تيجي على المحل وتعيط وتصيح! يا محااااسن الصدف

مش معقول شو عمان صغيرة!!! وما أكتر هاي المواقف! كل الناس بتعرف بعضها

يعني مش بعيدة  الواحد يتعرف على واحد بالشارع ويطلع أبوه في الآخر، أبدًا ما بستغرب إشي زي هيك في عمان

موقف 2، بوقفك شرطي بالشارع :رخصتك ورخصة السيارة أبو الشباب

تفظل…  وبيعطيه الرخص

شو بقرلك جيمس خريسات؟

هاظ ابن عمي الروح بالروح

يا هلا بكل أهل السلط، أنا اسمي ديفيد خريسات والله، وجيمس هاظ بيكون ابن عم عمة أبو خال جدي

من عظام الرقبة يا هلا بيك

بس يا أبو الخريسات المرة الجاي ما تحكي تلفون واتدخن وتشحط وتسكر  وإنتا بتسوق، بس عشان جيمس رح أمشيلك إياها اليوم

كبيرررر يا معلم

موقف 3

إنتي وين درستي؟

بالفرير

بتعرفي ربيع عيسى!؟

آه أكيد، هاي أختي! والله إنو الدنيا صغيرة! قد منخار النملة!

there is something called 6 degrees of seperation

in Jordan… it’s only one degree (or even less)

يعني أي حدا…. أي حدا في عمان مين ما كان، لا زم يكون مرق عليك من قبل، أو بقربلك أو شايف وجهو في مكان ما، هاد إذا ما طلع من أفراد العائلة المباشرين، والأسخم الفيس بوك، جد جد جد، كل الناس بتعرف بعضها كل الناس في بينهم ناس مشتركة بطريقة أو بأخرى

صارت عمان زي القرية lol

بس بصراحة، هادا الإشي بميز عمان ومش إشي سلبي (غير بحالات الأسافين) الله يبعدها عن الجميع، هادا الإشي ممتع وبيضحك ومرات بمنع الواحد من إنو يتهور مع الناس، يعني الواحد بيصير يفكرمليون مرة  قبل ما يعمل حركة في واحدة بالشارع بلاش تطلع صاحبة إمو أو حتى إمو نفسها!

وجهك مألوف؟ وين شايف هاي السحنة من قبل؟


All rights are reserved

مبادىء وقواعد المشاة 101

مبادىء وقواعد المشاة 101

على الدولة وضع فحص للمشاة ،لكل شخص بالغ وعاقل يود الخروج من منزله سيرًا على قدميه مشابه لفحص رخصة القيادة، لتعليم الناس كيفية السير في الشوارع وآداب قطع الشوارع لأنو ما شا الله عليهم يخزي العين، برفعوا الراس، وعلى الدولة منع أي شخص لم ينجح في اختبار المشاة من مغادرة المنزل وأي شخص في الشارع ما معو رخصة مشاة بوجهو على الجويدة ويجب أن ينص الكتاب علىالقواعد التالية

أولاً: جسور وأنفاق المشاة ليست موجودة كديكور ولتجعل البلاد تبدو متحضرة جميلة بل من الممكن استعمالها من قبل المشاة لقطع الشوارع

بتقدروا تمشوا على الجسور وتستعملوا الأنفاق، الله بيعينكوا يعني إزا مش حابين تيجي سيارة طايرة اتطيركم

ثانيًا : تحديد سرعة قطع المشاة الشارع لأنو المشاة بيقطعوا الشارع على أقل من مهلهم كأنو شارع الوالد

ثاالثاً: أقصر مسافة بين نقطتين هي الخط الواصل بينهما، بعرض النور اقطعوا الشارع زي البشر (الرجاء مشاهدة الصور التوضيحية المرفقة) يعني حاولوا ماتقطعو الشارع بالطول

رابعا : وهذه النقطة موجهة للبنات ، مع إني بنت بصراحة لما أشوف واحدة قاعدة بتمشي زي كأنها كيت موس وهية قد البغلة ولابسة بنطلون صحت كل أهلها الصبح عشان يساعدوها تسكر سحابو بتلفت نظري وبتشتت انتباهي يعني بصراحة لما تمشي بالشارع أو تقطعي الشارع (للبنات) حاولي ما تكوني سبب أي حادث مميت وارحمي الناس يعني !! إزا حابة تعملي رياضة وتركضي بالشارع أنا لا أنصح مطلقًا بأي شارع من شوارع عمان وهيني حذرت البنات وإنتو حرين بحالكم!

خامسًا، الدولة حطت سياج بنص الشارع عشان تعرف إنو هادا الشارع خطير (زي شارع الجامعة على سبيل المثال) وفرصة يعني تستعمل النفق أو جسر المشاة، ولم تضعه الدولة لتمارس رياضة القفز عن الحواجز

سادسًا وهذا قانون يا رب الدولة تطبقه بصراحة لأنو قلبي مغلول من هاي القصة… تغريم أي شخص قطع الشارع تحت جسر المشاة أو فوق نفق المشاة واندعس لأنو سبب صدمة عاطفية للشخص اللي دعسو، عشان السائق شاف واحد بيندعس ورح يضلو معقد طول عمرو

بصراحة الله يعين أي واحد دعس حدا هون لأنو بيطلع معشي العيلة (فلافل) وبطلع أهم واحد بالعالم وبيضل السائق يحاول يعوضوا طول عمرو ويصرف عليه وعلى كل أهلو وبيصرف على عمليات ترميم وتجميل لإلو ولأهلو وبيرجع هو وأهلو معدلين وأحسن من قبل

وحتى أكون منصفة الله يعين أهل اللي بيندعسوا كمان لأنو الموضوع مش مزحة ودمر عائلات كتير وأدى للوفاة (لا سمح الله) فحوادث الدهس كثيرة في البلد وقضت على حياة كتير من الناس، سواء السائق أم “المشاة”

بس فكركم لو بدأنا نطبق قواعد المشاة هاي بتخف هاي الحوادث ولا لأ؟؟؟؟

جميع الحقوق محفوظة

اعرف نفسك

بدنا اليوم نحكي عن

Applications

اللي على الفيس بوك

هل أنت عنيد؟ اعرف شخصيتك من لون جراباتك؟ هل أنت متسرع ؟ هل أنت أشقر؟ هل تحب المنسف؟ اعرف دينك (يعني ممكن الواحد ما يكون عارف شو دينو والفيس بوك رح يساعدو على اكتشاف دينو) هل أنت موسيقي؟ هل أنت موهوب؟ هل أنت حمار؟ هل تحب الحمير؟ يعني يخزي العين صاروا يعرفوا كل شي عنا ومستعدين يحكولك مين بتحب ومين بتكره وشو إسم إمك من لون عيونك

اعرف أغنيتك المفضلة من طول حواجبك، أي أغنية متعب الصقار أنت؟ هل أنت من مشجعي ريال مدريد ولا برشلونة؟ هل أنت وسيم ؟ هل أنت جذاب (أحلى إشي بيعمل الواحد هادا الاختبار وبيطلع وسيم فبكيف على حالو وبيحط النتيجة على البروفايل على الفيس بوك) إنو أنا وسيم يا ناس، يا سلااام

هل أنت عبقري؟ اعرف نفسك من طريقة تنفسك، اعرف شخصيتك من نوع سيارتك (يعني إزا كانت كيا سيفيا… مصيبة يمكن) اعرف متى رح تموت وكيف؟ هل أنت خجول؟ هل أنت حمار وغبي لأنك بتصدق هاي الاختبارات؟ ومن كل عقلك رح يحكولك إشي جديد ما بتعرفوا عن حالك؟؟؟؟

يعني المفروض إنك بتعرف إزا كنت حمار ولا لأ أو عنيد ولا لأ ومش بحاجة لحدا يحكيلك ،لأنك ما انولدت امبارح وعند فكرة عن حالك، والمفروض إنك بتعرفي مين بتشبهي من المغنيات والممثلات لأن الناس ما بتصدق تشوف بنت وتحكليها (بتشبهي لميس ولا أنجلينا جولي ولا هيفا وهبي) فأكيد عندك فكرة عن الموضوع

وبعدين مين هادا التيس بوك عشان يحكيلي متى رح أموت؟؟؟ آه؟؟؟؟

find out when are you going to die

وبيعطوني التاريخ والساعة فبخف عقلي والطريقة إني رح أوقع من الطابق ال64 بس ما رح أموت لأن في حدا رح بنقذني بس رح تيجي سيارة بعد 51 دقيقة تدعسني

يعني شكرًا كتير، لولا هاي المعلومات القيمة ما كان عرفت شي عن حياتي وشخصيتي وحظي بالحياة

thank you Facebook

حقوق الطبع محفوظة