يا هلا بالقرابة

لن يفهم ما سأتحدث عنه الآن إلا من يعيشون في الاردن وفي مدينة عمان العاصمة بالتحديد

شوفولي هادا الموقف مثلاً، بتكون واقف على طابور في البنك أو طابور على الكاش وبلف عليك اللي قدامك وبيجحرك، فبتعصب، لأنك خلقة معصب من الدور الطويل ومش ناقصك غير يجحروك الناس، فبتقرر تجحرو جحرة قوية، فبجلس الشب وبعرف غلطو (بس ما بدي أظلمو، ما في بإيدو إشي إحنا شعب بنجحر بطريقة لا إرادية غير متعمدة كطريقة للتواصل مع الناس) فبحاول ينقذ الموقف وبيحكيلك

يا أخي أنا شايفك من قبل ، بس مش متذكر وين

يا عيني على هاي الجملة ما أحلاها!!!! هاي الجملة قائم عليها مجتمعنا الأردني كلو!!! وهي الجملة الأكثر استعمالاً بالأخص عند تزبيط البنات، يعني شايفك من قبل ووجهك مألوف أقدم عبارة تزبيط في الأردن ولسه الناس بتستعملها كل يوم، قدييييمة يا جماعة لاقوا إشي تاني، يعني بالله عليك؟ شايفني من قبل ؟ وإزا شايفني ؟ خلص صرنا قرابة وحبايب؟

ما علينا ، المهم  نرجع للشب اللي واقف فوق وعايف حالو ، قرر يجامل الشب اللي بيجحرو ، إنتا شو اسمك عفواً يعني؟

أنا مايكل العبادي (هاد اسم عشوائي) مش قصدي أي شخص معين

شو بقربلك جون العبادي؟

هاظ أبوي!

وخدلك بعدها… أبوك كان شريكي بالمحل قبل ما بعتو واشتريت تلفون وبتذكرك وإنت طولك شبر لما كنت تيجي على المحل وتعيط وتصيح! يا محااااسن الصدف

مش معقول شو عمان صغيرة!!! وما أكتر هاي المواقف! كل الناس بتعرف بعضها

يعني مش بعيدة  الواحد يتعرف على واحد بالشارع ويطلع أبوه في الآخر، أبدًا ما بستغرب إشي زي هيك في عمان

موقف 2، بوقفك شرطي بالشارع :رخصتك ورخصة السيارة أبو الشباب

تفظل…  وبيعطيه الرخص

شو بقرلك جيمس خريسات؟

هاظ ابن عمي الروح بالروح

يا هلا بكل أهل السلط، أنا اسمي ديفيد خريسات والله، وجيمس هاظ بيكون ابن عم عمة أبو خال جدي

من عظام الرقبة يا هلا بيك

بس يا أبو الخريسات المرة الجاي ما تحكي تلفون واتدخن وتشحط وتسكر  وإنتا بتسوق، بس عشان جيمس رح أمشيلك إياها اليوم

كبيرررر يا معلم

موقف 3

إنتي وين درستي؟

بالفرير

بتعرفي ربيع عيسى!؟

آه أكيد، هاي أختي! والله إنو الدنيا صغيرة! قد منخار النملة!

there is something called 6 degrees of seperation

in Jordan… it’s only one degree (or even less)

يعني أي حدا…. أي حدا في عمان مين ما كان، لا زم يكون مرق عليك من قبل، أو بقربلك أو شايف وجهو في مكان ما، هاد إذا ما طلع من أفراد العائلة المباشرين، والأسخم الفيس بوك، جد جد جد، كل الناس بتعرف بعضها كل الناس في بينهم ناس مشتركة بطريقة أو بأخرى

صارت عمان زي القرية lol

بس بصراحة، هادا الإشي بميز عمان ومش إشي سلبي (غير بحالات الأسافين) الله يبعدها عن الجميع، هادا الإشي ممتع وبيضحك ومرات بمنع الواحد من إنو يتهور مع الناس، يعني الواحد بيصير يفكرمليون مرة  قبل ما يعمل حركة في واحدة بالشارع بلاش تطلع صاحبة إمو أو حتى إمو نفسها!

وجهك مألوف؟ وين شايف هاي السحنة من قبل؟


All rights are reserved

Advertisements

16 responses to this post.

  1. Posted by Mohammad on March 27, 2010 at 6:49 pm

    هاد الشي مش بس بعمان، انا عشت باربد و الناس بتعرف بعض على الشبه و اللهجة، و هسه بصير معي نفس ما فلتي و انا بعمان من 3 سنين 🙂

    Reply

  2. والله صححح! نسيت إربد! 😛

    Reply

  3. In one of Irbid’s universities, I once taught school teachers a university level course. What was so funny is that every teacher was trying to find a kin relationship between me and him or her. I found that the 30 people in my class had some relationship with me. Although, non had the same last name as mine and my mother not even a Jordanian! You were very right when you said this post will be understood by Jordanians only because I don’t think such thing happens anywhere except in Jordan.

    Reply

  4. أنا وين شايفتك؟

    Actually we are a great example of that. I’ve known you for about two years and I discovered that you knew my cousin from college and you were friend with my other cousin without even realizing that the three of us were related!

    Reply

  5. هالحكي بكل الأردن ما شاء الله علينا الكل بعرف الكل والكل بقرب للكل بشكل او بأخر زي ماحكيتي أقل من one degree of seperation

    Reply

  6. Posted by Bassem on March 29, 2010 at 7:13 pm

    When I lived in New York and rode a taxi with a Muslim driver (akbar ali khan mohammad ali hussein zu al fuqqar).. I would always speak in Arabic on my phone and they would then ask me where I was from and I would say i was Palestinian and they would ask .. “Do you know Yasser Arafat”. I would tell them he was my father’s cousin… ibn 3am il walled….

    Reply

  7. as my friend used to say: “Jordan is a bunch of pointers pointing 2 each other”
    i always been asked the same question: :”are u from katha family?”, and it is always the same family name 🙂

    Reply

  8. بس بصراحة شغلة “اهلا يا قرابة” بتفيد احيانا
    يعني مرة كنت انا و صاحبي بالسيارة فوقفتنا الشرطة و كنا على طريق اربد المشكلة صاحبي كانت سيارتو خالص
    ترخيصها و الشرطي انتبه لهاي الشغلة بس لما سالو انت سكان وين ، طبعا صاحبي ساكن بضاحية الحسين بالرابية
    و طبعا اخونا الشرطي فكر ضاحية الحسين باربد ، لهو صار يحكيلو هاد اطلعنا قرابة طيب
    خلص روح يا ابن عمي بدناش نخالفك هاي المرة بس دير بالك

    شو بالنسبة!

    Reply

  9. Posted by muhib on April 26, 2010 at 12:17 pm

    It’s like ur speaking my mind. I loved it

    Reply

  10. Posted by Talal on August 10, 2010 at 12:32 am

    اما شو انو “مايكل العبادي” اسم عشوائي يا سيرين، فرطتيني ظحك بس بصراحة بتفيد زي ما حكى الأخ
    انا صار معي الموقف نفسه الشرطي قالي الرخص بعدين انت تويت التوايتة قلت نعم قال يقربلك تويتان التوايتة قلت ابن عمي و حبيب قلبي عاد انا اول مرة اسمع الاسم قلي اتوكل على الله طريقك خظرا

    Reply

  11. Posted by Zaid on August 24, 2010 at 5:13 am

    انا وين شايفك مش متاكد بس يمكن بمحل احذيه

    Reply

  12. yeah right!! like everybody knows how to fix a car or a computer or know the weather, or how hybrid cars work, or every place and restaurant in Amman, yes honey, i can say more!!

    Reply

  13. sorry this comment should be at other post!! 🙂

    Reply

  14. هههههههههههه مزبوط كلامك سيرين الكل صار بعرف كل شي وفصيح ومافي منه اثنين تعالي هلا على شغلنا في مجال الستلايت الكل بعرف القنوات وشو هوا التشفير والكل بعرف القطع ومصطلحاتها العلميه مع العلم انه كله غلط في غلط وبخرب الدنيا وفي النهايه احنا المستفدين ههههههههه

    Reply

  15. Posted by saif on December 4, 2010 at 12:22 am

    والله كنت حاسس انك رح تكتبي هيك خاطرة

    انا اساسا بعرف امن زمان بس ما بعرف ليش لهسا حتى عرفت

    ع كل حال انا بعرف انها مقالة حلوة

    هههههههههه

    هذا واقع الحال يا سرين بعين الله

    Reply

  16. Posted by Fawaz on September 27, 2011 at 1:22 pm

    “there is something called 6 degrees of separation
    in Jordan… it’s only one degree (or even less)” HAHAAA! so TRUE!!
    Just came across ur blog and i must say that ur really talented! keep up the good work 🙂
    I’d start a fan page on fb if i were u, much more exposure!

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: